Bombardement Moontse

Ich waor e jaor of zès. 't Waor duuster en de bomme vloge över oos hoes. V'r wonde naeëve de baan en d'r pap kieëm os rope. V'r moesse nao d'r beunker. De klèjjer doog v'r zoe-wie-zoe al neet mie oet es v'r gonge sjlaope en v'r lepe midde-n-in de nach, dör 't vaeld, richting 't Sjtèèntevaeld: de oadste väöroet, mae d'r pap bleef bie mich. Ich waor 't klèngste. De bomme vloge roond os en opèns zaet d'r pap: "Kom, v'r liegke os in dae graaf". Mae 'ch koes 't neet laote um uvver d'r graaf hee, te kieke nao dat bombardemaent en 't is raar, mae dat waor 't fiengste vuurwaerk dat 'ch oeëts gezieë han. Wie v'r d'r nao truuk nao hèèm koesse waor aal kapot. De muur sjtonge nog rech mae dao waor ooch aal mèt gezag. Alle veenstere kapot en de plafonge loge zelfs a g'n eerd. Vanaaf doe haant v'r zieëker e jaor onder 'n banebrök (tössje 't Sjtèèntevaeld en de Avenue de l'Europe) gesjlaope. Bie dit bombardemaent kome mieë wie 200 luuj öm. Luuj die wèrkde an de baan mae ooch luuj die v'r kaante en die vlak langs de baan wonde. 't Nuuj kèrkhof op d'r waeg nao ge Sjtèèntevaeld is doe ooch geboewd ömdat 't aod kèrkhof öm de kèrk te klèng waor öm al die doeje te begrave.