De kop va Joëhannes den Deuhper op een sjoëhtel
De kop va Joëhannes den Deuhper
op een sjoëhtel. (Mahrk. 06, 14-29)
14 Oohch kuëning Hiëroëdes
hoëhrt van hèùm,
want ziene naam woar bekènd woëhre
en ze zagte: Joëhannes den Deuhper
is van de doë opgesjtahnge en doaróm
wèhrke diej wóhnjerkrachten ihn hèùm.
15 Ahngere zagte: ’t Is Elias,
en wèèr ahngere zagte:
Ene profiët, wiej eehne van de profiëte.
16 Wiej Hiëroëdes dat gehoëhrd haw,
zag hèèh: Dèè wat ich de kop
hùb loaten aahfhowwe, Joëhannes,
dèè is opgesjtahnge.
17 Want hèèh, Hiëroëdes,
haw ter d’r-op oehtgesjik óm Joëhannes
op te pakken en hèùm geboeid
in de gevahngenis te sjmiehte
vawèège Hiëroëdieja,
de vrow va zie broar Philippus,
ómdat hèèh zich hèùr getrowd haw.
18 Want Joëhannes
haw tèèngen Hiëroëdes gezag:
Giër moog
de vrow van uër browwer neet hùbbe.
19 Dus haahtde Hiëroëdieja hèùm
en wol hèùm doëd maahke,
mê dat kós ze neeht,
20 want Hiëroëdes
haw óntzag vuër Joëhannes, ómdat hèè wos,
dat dat ene richvèèrdige
en hèhlge mahn woar
en hèè besjermden hèùm.
En went hèè noa hèùm geloehsterd haw,
wos hèè zich geehne road miëh,
en toch loehsterde hèè gèèr noa hèùm.
21 Mê ee good gelèèhg keem vuër hèùr
op den daahg, dat Hiëroëdes
op ziene verjoardaahg enen dienee hólj
vuër zien topfunksjenaahrisse, de lèèhgertop
en de notaahbele va Galielèjja.
22 Want wiej de dochter van diej Hiëroëdieja
noa bènne woar kóhmmen en dahnsde,
geveel diej Hiëroëdes
en diej biehj hèùm zoohten te èèhte.
Doew zag de kuëhning tèèngen ’t mèèdje:
Vroag mich mer wats te wihls,
en ich zal ’t dich gèèhve.
23 En hèè zjwoëhr hèùr mit vèùl noadrùk:
Wats te mich ooch vriëgs,
ich zal ’t dich gèèhve,
zellefs de hèllef va mie kuëhninkriehk.
24 Doew góng ze weg
en zag tèèngen hèùr moëhder:
Wat zahl ich mich vroage? En diej zag:
De kop va Joëhannes den Deuhper.
25 En d’rek sjpowde ze zich noa de kuëhning
en zag wat ze zich wuhnsjde:
Ich wihl, dat ger mich noehw d’rek
op een sjoëhtel
de kop va Joëhannes den Deuhper gef.
26 Doew woëhrt de kuëhning deep bedreuf,
mê vawèège den eehd ehn vawèège diejgenige
diej mit aahzoohte,
wol hèè ‘t hèùr neet weehgere.
27 En d’rek sjikde de kuëhning
ene soldoat van de wach eweg
mit de opdrach de kop va Joëhannes te hoahle.
En dèè góng eweg
en sjloog hèùm de kop aahf in de gevahngenis,
28 en brach ziene kop op een sjoëhtel
en geef diej aan ’t mèèdje
en ’t mèèdje geef ze aan hèùr moëhder.
29 Wiej zien liërlinge dat gehoëhrd hahwwe,
keehme ze zie liehk eweg hoahle
en lagten ’t in ee graahf.