Welk Limburgs wuuert gebroek oppe website vanne streektaalfunctionaris?

Me kan gerös aannumme det 't Mestreechs in Limburg waal de meiste spraekers haet. Daonao zal waal 't Kèrkraods kómme. Welk Limburgs dialek zal de minste spraekers höbbe? 't Dialek van Panhael (tösse Toear en Hael, in Midde-Limburg)? Mót me vanwaege die väöl Mestreechtenieëre dan Mestreechs sjrieve oppe website vanne streektaalfunctionaris?

Alle Limburgse dialecte zeen aeve väöl waerd. Ze zeen ouch allemaol aeve sjoean, aeve ingewikkeldj of gemekkelik. Me mót 't Limburgs sjrieve det me good kintj. Veure streektaalfunctionaris van dit moment is det 't Moferts, det hae van kindjsaafaan gelieërd haet. In det dialek zal hae sjrieve. Dao zólle ein 3.000 miense zeen die Moferts kalle. Mer 't Moferts is inne ganse provincie Limburg good te verstaon. 't Moog dus gerös gebroek waere. De opvolgers vanne streektaalfunctionaris van op vandaag zólle gaon sjrieve in häör eige Limburgs: dan zal me det Moferts weer mit de lamp mótte gaon zeuke. Meh waatj g'r hie laes, is Moferts.

En zoe ‘spraak’ d’n ierste Limburgse streektaalfunctionaris in ’t Moferts. Zoe-as hae veurspeld haet, gebroeke de nieje streektaalfunctionarisse häör eige plat. ’t Logische gevolg daovan is det dees website multi-dialektisch is gewaore, doordet versjillende dialekte door elkaar gebroekt waere. De invloed van Ton van de Wijngaard is veurnamelijk ’t Egelzer plat, hoewel hae ouk good oet de veut kan met ’t Kerkraods. Mieke Steegs sprikt en sjrieft ’n mengelmoes van veurnamelijk Blieriks en Heljes, dialekte die get noordelijker in de provincie gespraoke waere. Mar wat heej juus zoe moeëi aan is: welk plat ze ouk schriefs, ’t is in de ganse provincie Limburg te laeze.