Zeutwaterzieëman

Van: Huub Brouns

---

Zien zieëmansjap waas väör de Maas te groeët,
want zieëheldj wäörs se op ein grindjgaat neet.
Dus ging ’t richting Zieëlandj mèt de boeët,
al haaj d’r van getieje geine weet.

Bie sjtorm haet hae bekwaomheid opgedaon.
Orkaankracht kós d’r mèt gemaak de baas.
Van golve die toet aan de zaling sjtaon
Lieërse se väöl mieër as van ein ganse Maas.

Rojaal sjtruitj hae zien avonture róndj.
Mer wie ’t richtig ging wètj geinen hóndj.
De waorheid liktj deep inne zieë begrave.

Zien sjeepke kwaam dao gaarneet oete have.
Want zaat dae kapitein zich neet te lave,
den laag d’r vast väör anker aan Kaap-kóntj.